MOI BOAS A TODOS E TODAS!!

Retomamos a rutina con novas ideas para facer cos nosos nenos e nenas.

Hoxe, lembrando o que vos gustaba a todos e a todas ter a responsabilidade de ser ENCARGADOS/AS, traémosvos un material para que todos o poidades ser cada día. 

Podemos facer as tarefas imprimindo estas imaxes ou, para que vos resulte máis cómodo e doado, facendo as mesmas tarefas sobre un folio, encerado ou outro material que teñades na casa.

Outro momento da semana que nos encanta a todos é o MOMENTO DO CONTO, e hoxe suxerímosvos o conto de "Rana de tres ojos" que podedes atopar buscando en google "cuento Rana de tres ojos PDF". 

Despois da lectura do conto, propoñémosvos estas actividades:

PARA OS NENOS E NENAS DE 3 ANOS:

• Debuxa unha rá de tres ollos e ponlle un nome. Trata de escribilo, conta cantas letras ten, pensa se é un nome longo ou curto e conta tamén as sílabas facendo palmas.
• De todos os obxectos que aparecen no conto, busca un de cor rosa, outro de cor azul, outro de cor negra e outro de cor branca expresando oralmente o nome de cada un deles.
• Agora, de todos os que aparecen no conto, identifica e nomea os que botarías á lata de lixo de cor amarela. Fai un pouco de memoria e pensa cales tiramos alí cando merendamos no cole.

PARA OS NENOS E NENAS DE 4 ANOS:

• Observa a primeira páxina do conto e describe as diferencias que ves entre as tres rás que aparecen nela. Fíxate nas partes do seu corpo.
• Escoita a canción do ciclo de vida dunha rá no seguinte enlace: https://www.youtube.com/watch?v=Mtd_jLjgq7w e expresa oralmente as diferentes etapas polas que pasa dende que nace ata que é adulta.
• De todos os obxectos que aparecen no conto, escribe os que comezan pola letra "R", "P", "S". Conta cantos hai de cada unha e proba a contar cantos escribiche en total.

PARA OS NENOS E NENAS DE 5 ANOS:

• Como vedes no conto, dende que a fábrica deixou de producir cousas, o medio ambiente mellorou. Visualiza este vídeo: https://www.youtube.com/watch?v=_RHU-_Skk0A e reflexiona por que agora as augas de Venecia son cristalinas e ata teñen cisnes e peixes.
• De todos os obxectos que aparecen no conto, investiga cales non debemos botar á lata de lixo verde, amarela nin azul, e deberían ir ao punto limpo. Podedes investigar no seguinte enlace: http://www.oqueseenchufareciclase.gal/osbolechas/ 
• Agora busca un obxecto que teñas pola casa que se poda reutilizar e escribe e/ou debuxa que novo uso lle darías.

Esperamos que vos gusten as actividades, e lembrade que estaríamos encantadas de que compartirades connosco as actividades a través do correo electrónico: aulainfantilsalvador@gmail.com 

Moitos bicos e abrazos para todos e todas, botámosvos moito de menos!!

Feliz luns familias!

Hoxe queremos traervos unha sorpresa chegada directamente dende Italia!! Lembrades o video que fixemos explicando diferentes comidas e postres do país sobre o que nos tocou investigar?... Atentos/as!





E agora, por que non facer unha destas receitas na casa? Podedes probar a elaborar a que vos tocou explicar no video ou calquera outra que vos guste!! Queda á vosa elección!

Tamén podedes compartir con nós o resultado a través de fotos, vídeos... a nós seguro que se nos fará a boca auga.

Esperamos que pasárades uns días o máis amenos e lúdicos posible e, xa sabedes, a partir de hoxe voltamos á rutina con máis actividades para vós!

Un biquiño e unha aperta! Vémonos en breve! #euquedonacasa#todosairáben

OLA DE NOVO FAMILIAS!!

Hoxe traémosvos novas propostas de actividades, co fin de facervos máis amenos estes días e que os nenos e nenas poidan continuar coa rutina escolar na medida do posible.

Por iso, e como hoxe é xoves, día de préstamo de contos, imos a facer unha serie de actividades a partir do conto de Leotolda, para acceder a el non tedes máis que buscar en Google "cuento Leotolda pdf".

Así mesmo, enviámosvos tamén o enlace a youtube para que os nenos e nenas poidan bailar e disfrutar coa canción do conto: https://m.youtube.com/watch?v=t8RIgLvaDoI   

Despois da lectura do conto, propoñémosvos estas actividades por idades:

Para os nenos e nenas de tres anos:

• Debuxa a Leotolda tendo en conta os seus atributos: GRANDE, REDONDA e de MOITAS CORES.

• Agora toca MOVER A LINGUA: pensa en palabras que comecen polo mesmo son /L/ e exprésaas en voz alta. 

• Trata de compoñer o nome de "LEOTOLDA" facendo as letras con diferentes materiais (plastilina, pasta, lentellas, arroz...).

Para os nenos e nenas de 4 anos: 

• Debuxa a LEOTOLDA e aos seus amigos TUTO, CATALINA E KASPER tendo en conta os seus atributos e cores.

• Xogo de EXPRESIÓN ORAL: Busca diferentes especies de DINOSAUROS e pronuncia o seu nome.

• Escribe o nome da protagonista do conto e dos seus amigos, e busca outras palabras que comecen pola mesma inicia /L/, /T/, /C/ e /K/.

Para os nenos e nenas de 5 anos:

• Inventa un final para este conto e debúxao.

• Xogo das PALABRAS ENCADEADAS: Coa compañía dun neno máis maior ou adulto, pensa unha palabra que comece pola mesma letra que Leotolda, logo o teu compañeiro de xogo buscará unha que comece pola última letra de Leotolda (exemplo: LÚA, AVÓ, OSO...). Pódese facer con dous ou máis xogadores!

• Trata de escribir o final que inventache para o conto.

Pero isto non é todo, como temos por diante as vacacións de Semana Santa, deixámosvos outras propostas máis para xogar cos números...Lembrade que podedes facer a que máis vos guste e mellor se vos adapte e, por suposto, coas modificacións e adaptacións que queirades! 

Aquí vai outro reto: 

Precisamos UN ROLO DE PAPEL HIXIÉNICO, moitos BOTÓNS DE DIFERENTES CORES, un ROTULADOR e unha PIZARRA (ou papel).

Proposta para os nenos e nenas de tres anos:

• XOGAR e EXPLORAR LIBREMENTE os BOTÓNS (facer composicións, debuxos...).

• Clasificar os botóns por cores.

• Coa nosa axuda, debuxamos trazos sinxelos na pizarra (liñas, ondas, letras...) e os nenos/as tratarán de repasalas colocando os botóns enriba das liñas.

• Coller cinco anaquiños de papel hixiénico e escribir en cada un os NÚMEROS DO 1 AO 5. Collemos un número e os peques deben colocar debaixo TANTOS BOTÓNS COMO INDICA O NÚMERO.

• Podemos colocar botóns por toda a pizarra e con cada número ir facendo COLECCIÓNS (exemplo rodear de 2 en 2, de 3 en 3...).

Proposta para os nenos e nenas de catro anos:

• XOGAR e EXPLORAR LIBREMENTE os BOTÓNS (facer composicións, debuxos...).

• Debuxamos TRAZOS SINXELOS na pizarra (ondas, letras...) e os nenos/as tratarán de repasalas COLOCANDO BOTÓNS enriba das liñas.

• Coller 10 anaquiños de papel hixiénico e escribir en cada un (coa nosa axuda se a precisan) os NÚMEROS DO 1 AO 10. Collemos un número e deben colocar debaixo TANTOS BOTÓNS COMO INDICA O NÚMERO.

• Podemos colocar botóns por toda a pizarra e con cada número ir facendo COLECCIÓNS (exemplo rodear de 2 en 2, de 3 en 3...).

Proposta para os nenos e nenas de 5 anos:

• Debuxamos LABIRINTOS na pizarra (con liñas, ondas, letras...) e logo repasámolas colocando botóns enriba das liñas. Podems colocar os botóns FORMANDO SERIES (por cor, tamaño ou forma dos botóns).

• Colocamos UN BOTÓN e facemos un debuxo na pizarra integrando o botón como parte do debuxo.

• Collemos 10 anaquiños de papel hixiénico e escibimos en cad un os NÚMEROS DO 1 AO 10. Collemos un número e deben colocar debaixo TANTOS BOTÓNS COMO INDICA O NÚMERO.

• Colocamos os NÚMEROS ORDENADOS do 1 ao 10, sacamos un número e deben descubrir CAL FALTA, buscar números MÁIS PEQUENOS e MÁIS GRANDES, buscar o ANTERIOR e o SEGUINTE...

Sabemos que son moitas actividades, pero temos por diante unhas pequenas vacacións así que dispoñedes de moitos días para facer todas estas actividades, e nós volveremos o día 13 de abril con novas propostas! 

Agardamos que disfrutedes destes días, dentro das posibilidades e que sigades co mesmo ánimo como ata agora!

Gustarianos recordar aos nosos nenos e nenas que aínda que non estamos no cole estes días, non nos esquecemos dos vosos aniversarios, polo que lles dicimos un PARABÉNS MOI GRANDE para MARÍA e para ALEXANDRE, así como para RYAN e DANIEL que estarán de cumple nestas vacacións! E recordarvos que á VOLTA o CELEBRAREMOS AO GRANDE!!! 

Moitos bicos para todos/as e seguimos botándovos moitísimo de menos!! 

Seguide FACÉNDOO ASI DE BEN, QUEDANDO NA CASA, COIDÁNDOVOS e COIDANDO AOS NOSOS! Sentímonos SÚPER ORGULLOSAS de vos!!!

TODO VAI SAÍR BEN!!!! 

Bos días familias!

Comezamos unha nova semana con máis propostas para amenizar estes días que a todos/as se nos fan un pouco máis monótonos do normal. Que vos parece se lle damos un toque de alegría ao luns cunha dinámica de arte? Aí vai a nosa proposta...

Facemos a nosa propia obra de arte sobre film transpartente? Atentos/as aos pasos que debemos seguir...

1. Escoller a superficie sobre a que ímos colocar o film (patas dunha mesa, cadeira...)

2. Colocar varias tiras de film transparente e escoller  a pintura que ímos empregar (preferiblemente témpera).

3. Chega a hora de pintar, deixando voar a nosa imaxinación!

Para os nenos/as de 3 anos: pon nome á túa obra de arte e trata de escribilo (non esquezas por o nome do autor/a). Podes facer unha serie con dúas cores das que empregache (tal e como se ve na imaxe).

Para os nenos/as de 4 anos: pon nome á túa obra de arte, escribe o teu nome e as cores que empregache. Podes facer unha serie con dúas ou tres cores co material que queiras.

Para os nenos/as de 5 anos: ponlle nome á túa obra de arte e escribe o seu significado. Podes facer unha serie con tres cores das que empregache.

E que máis podemos facer? 

Lembrades quen era o autor da "Mona Lisa"? Podedes buscar en internet a obra que máis vos guste del e compartila con nós a través do correo aulainfantilsalvador@gmail.com

E, falando de autores, sabiades que hai un artista italiano que facía cadros con froitas e outros elementos da natureza? Pois lanzamos un reto! Investigar quen é este autor e facer unha obra de arte con froitas, verduras e outros elementos naturais que teñades pola casa.

Que vos parece se despois de tanto investigar e elaborar obras de arte, xogamos un pouco? Apetécevos? Aquí deixamos as nosas suxerencias...

Podemos reciclar as botellas de plástico que teñamos pola casa e xogar unha partida aos bolos.

Materiais necesarios:

- Botellas de plástico 

- Elementos para decorar (gomets, pintura, papeis de diferentes texturas...)

- Pelota de tamaño axeitado (bola de lá, pelota de tenis...)

Para os nen/as de 3 anos: encher as botellas con diferentes materiais (papel, teas...) e decorar por fóra como máis vos guste (podemos ver exemplos na imaxe).

Para os nenos/as de 4 anos: decorar as botellas con diferentes emocións (ledo, medorento, alporizado adurmiñado, triste...).

Para os nenos/as de 5 anos: decorar as botellas con números e ir sumando a puntuación dos bolos que consigades derribar.

E agora... a xogar!!

Outra das propostas consiste en elaborar un xogo para poñer a proba a vosa puntería.

Materiais que precisamos:

- Un vaso de plástico

- Pegatinas

- Un cordel duns 60 cm de longo

- Unha pelota de porexpan (serve tamé o tapón de plástico)

- Un punzón

- Unha agulla

- Rotuladores

Cómo o facemos? En primeiro lugar, faremos un burato na parte inferior do vaso cun punzón e, a continuación, introducimos o cordel. Ataremos un nó na punta e outro no extremo. A continuación, atamos tamén a pelota de porexpan ou tapón de plástico, ao que previamente lle faremos un burato que o atravese dun lado a outro en dirección vertical. Por último, facemos outro nó na punta para que a pelota/tapón quede suxeito/a (ver imaxe). 

Finalmente, decoramos o vaso con pegatinas e decoramos a pelota ou tapón con rotuladores e... a encestar!

Outra variante deste xogo, consiste en empregar as botellas de plástico dos bolos e elaborar uns aros de cartón, por exemplo, para encestalos nas botellas (ver imaxe).

O derradeiro xogo que vos propoñemos, consiste en elaborar un circuito nunha tapa de cartón empregando palliñas (ver imaxe). Despois, podemos dirixir mediante o sopro unha boliña de porexpan por todo o circuito ou ben empregar unha canica e, en lugar de usar o sopro podemos facelo movendo a tapa coas mans.

Esperamos que vos gusten estas actividades e que compartades con nós os resultados!!

P.D. Por certo, moitas grazas polo video "Coronavirus VS nen@s". Aproveitamos para subilo ao blog! Aparece xusto despois desta entrada. Gran traballo!!

Un biquiño moi forte para tod@s vós! E xa sabedes vémonos en breve!! #euquedonacasa#todosairáben

CORONAVIRUS VS NEN@S

Qué orgullo que nos chegue un novo video dos nosos nen@s dando uns sabios consellos para non contaxiarse e non contaxiar o COVID-19. Os adultos/as prometemos cumprir todo o que aquí nos indicades...



Estamos moi contentas de todo o traballo que estades a facer nas vosas casas, non podemos pedir máis. Temos uns nen@s e unhas familias de 10!!!!! Noraboa!!